واشنگٹن: وائٹ ہاؤس کے قریب جم میں فائرنگ، ایک شخص ہلاک، 5 زخمی، حملہ آور بھی مارا گیا

امریکی دارالحکومت واشنگٹن ڈی سی میں وائٹ ہاؤس کے قریب واقع ایک جم میں فائرنگ کے افسوسناک واقعے کے نتیجے میں ایک شخص ہلاک جبکہ 5 افراد زخمی ہو گئے، تاہم جوابی کارروائی میں حملہ آور بھی مارا گیا۔

مقامی پولیس حکام کے مطابق واشنگٹن کے گنجان آباد علاقے لوگن سرکل (Logan Circle) میں فائرنگ کے متعدد واقعات رپورٹ ہوئے، جس کے بعد قانون نافذ کرنے والے ادارے فوری طور پر حرکت میں آ گئے۔ فائرنگ کی اطلاع ملتے ہی علاقے میں پولیس اور سکیورٹی فورسز کی بھاری نفری تعینات کر دی گئی جبکہ حفاظتی اقدامات کے پیشِ نظر متعدد ملحقہ سڑکوں کو ٹریفک کے لیے بند کر کے شہریوں کو متاثرہ علاقے سے دور رہنے کی ہدایت جاری کر دی گئی۔

حکام کا مزید کہنا ہے کہ فائرنگ کے واقعے کے بعد احتیاطی تدابیر کے طور پر قریبی سکولوں میں فوری طور پر لاک ڈاؤن نافذ کر دیا گیا، جبکہ مختلف تحقیقاتی اور سکیورٹی اداروں کے اعلیٰ حکام نے جائے وقوعہ پر پہنچ کر شواہد اکٹھے کرنے اور واقعے کی وجوہات جاننے کے لیے باقاعدہ تحقیقات کا آغاز کر دیا ہے۔