مدارس کی رجسٹریشن اور بینک اکاؤنٹس کا مسئلہ حل ہو چکا ہے: طاہر محمود اشرفی

متحدہ مدارس کونسل اور قومی امن کمیٹی کے ممبران نے حکومت پنجاب کے ذمہ داران سے ملاقات کی جس میں صوبے بھر میں مدارس کی رجسٹریشن، متعلقہ قانون سازی اور حکومتی تعاون کو مزید مضبوط بنانے کے امور پر تفصیلی تبادلہ خیال کیا گیا۔ ملاقات کے بعد چیئرمین پاکستان علماء کونسل حافظ طاہر محمود اشرفی نے کہا کہ اسلام آباد میں تمام مدارس کی رجسٹریشن اور بینک اکاؤنٹس کا مسئلہ مکمل طور پر حل ہو چکا ہے جبکہ حکومت پنجاب کی جانب سے رجسٹریشن کے عمل کا آغاز بھی قابلِ تحسین ہے۔ انہوں نے مدارس کو ختم کرنے یا ان پر قبضے کے حوالے سے پھیلائے جانے والے خوف کو مسترد کرتے ہوئے واضح کیا کہ مدارس کی آزادی اور خودمختاری کے تحفظ کے لیے سب مل کر کام کریں گے۔ طاہر محمود اشرفی نے مدارس کے 26 سالہ دیرینہ مسئلے اور بینک اکاؤنٹس کھلوانے میں کلیدی کردار ادا کرنے پر وزیراعظم شہباز شریف، فیلڈ مارشل عاصم منیر اور وزیراعلیٰ پنجاب مریم نواز کا شکریہ ادا کرتے ہوئے بتایا کہ ملاقات میں 15 مدارس بورڈز میں سے 11 بورڈز کے نمائندوں نے شرکت کی اور آئندہ بھی رجسٹریشن میں حائل کسی بھی رکاوٹ کو فوری دور کیا جائے گا۔