کھلاڑیوں کے سینٹرل کنٹریکٹ کا اعلان ایک سے دو دن میں ہو جائے گا، محسن نقوی

چیئرمین پاکستان کرکٹ بورڈ (پی سی بی) محسن نقوی نے لاہور میں میڈیا سے گفتگو کرتے ہوئے کہا ہے کہ کھلاڑیوں کے سینٹرل کنٹریکٹس کا اعلان آئندہ ایک سے دو روز میں کر دیا جائے گا، جبکہ انہیں اپنی ٹیم پر پورا یقین ہے اور گزشتہ ایک سال سے ٹیم کی کارکردگی و نتائج میں مسلسل بہتری آ رہی ہے۔ انہوں نے واضح کیا کہ تاحال ٹیم میں کسی قسم کی تبدیلی نہیں کی جا رہی اور جب بھی کوئی تبدیلی ہوئی سب کو آگاہ کر دیا جائے گا، تاہم کھلاڑیوں میں موجود خامیوں کو دور کرنے کے لیے بھرپور کوششیں کی جا رہی ہیں۔ چیئرمین پی سی بی نے مزید بتایا کہ نیشنل سائبر کرائم انویسٹی گیشن ایجنسی (این سی سی آئی اے) محمد رضوان سے دوبارہ رابطہ کرے گی جس کے بعد رپورٹ حتمی شکل اختیار کرے گی، جبکہ نیشنل کرکٹ اکیڈمی کی اپ گریڈیشن کا کام 31 جنوری تک مکمل کرنے کی ڈیڈ لائن مقرر کی گئی ہے جہاں مستقبل کے لیے نوجوان کھلاڑی تیار کیے جائیں گے۔