سیاسی بقا کیلئے فوجی کارروائی اسرائیل کیلئے تباہ کن ہوسکتی ہے: آئزن کوٹ کی نیتن یاہو کو وارننگ

اسرائیل میں وزارتِ عظمیٰ کے امیدوار گادی آئزن کوٹ نے نگران وزیراعظم بنیامین نیتن یاہو پر زور دیا ہے کہ وہ سکیورٹی سے متعلق اہم فیصلوں میں تحمل اور دانشمندی کا مظاہرہ کریں۔

سماجی رابطے کی ویب سائٹ ‘ایکس’ پر جاری اپنے بیان میں گادی آئزن کوٹ نے کہا کہ ایران پر ممکنہ نئے اسرائیلی حملوں کے تناظر میں نئی حکومت کے حلف اٹھانے تک کسی بھی قسم کے خطرناک اقدامات سے گریز کیا جانا چاہیے۔ انہوں نے خبردار کیا کہ سیاسی بقا کے لیے فوجی کارروائی کا استعمال اسرائیلی جمہوریت اور عوامی اعتماد کے لیے تباہ کن نتائج کا باعث بن سکتا ہے۔

آئزن کوٹ کے مطابق براہِ راست اور فوری خطرے کی عدم موجودگی میں سکیورٹی اداروں کا استعمال خطرناک ثابت ہو سکتا ہے، لہٰذا موجودہ عبوری مرحلے میں انتہائی احتیاط اور ذمہ داری کا مظاہرہ کرنا ناگزیر ہے۔