سعودی عرب میں حوثی ملیشیا کے 2 ڈرونز اور 5 میزائل حملے ناکام

سعودی عرب کے فضائی دفاعی نظام نے بروقت اور مؤثر کارروائی کرتے ہوئے مملکت کے مختلف علاقوں کی جانب داغے گئے حوثی ملیشیا کے 2 ڈرونز اور 5 میزائل حملے فضا میں ہی ناکام بنا دیے۔

یمن کی آئینی حکومت کی بحالی کے لیے قائم اتحادی افواج کی جانب سے جاری بیان کے مطابق حوثی ملیشیا کی طرف سے مکہ مکرمہ اور سعودی عرب کے جنوبی علاقوں کو نشانہ بنانے کے لیے بھیجے گئے 2 بارود سے لدے ڈرونز کو فضائی دفاعی نظام نے بروقت کارروائی کرتے ہوئے فضا میں ہی تباہ کر دیا۔

اتحادی افواج کے ترجمان میجر جنرل ترکی المالکی نے تفصیلات بتاتے ہوئے کہا کہ دارالحکومت ریاض ریجن کی جانب داغے گئے حوثی ملیشیا کے 3 کروز میزائلوں کو بھی کامیابی سے تباہ کر دیا گیا ہے، جبکہ سعودی عرب کے مغربی علاقے کی جانب داغے گئے مزید 2 بیلسٹک میزائلوں کو بھی فضائی دفاعی نظام نے ہدف تک پہنچنے سے قبل ہی فضا میں روک کر تباہ کر دیا، جس کے نتیجے میں کوئی جانی یا مالی نقصان نہیں ہوا۔