امریکا اور اسرائیل کو ان کے جرائم کا نتیجہ انتخابات میں مل گیا، ایرانی صدر

ایرانی صدر مسعود پزشکیان نے کہا ہے کہ امریکا اور اسرائیل کو ان کے جنگی جرائم کا سیاسی نتیجہ ان کے اپنے ہی انتخابات میں مل گیا ہے، جبکہ یورپی انتخابات میں بھی عوام نے جنگ پسندانہ نظریات کو مکمل طور پر مسترد کر دیا ہے۔

میڈیا سے گفتگو کرتے ہوئے صدر مسعود پزشکیان کا کہنا تھا کہ عالمی ماحولیاتی کانفرنس ‘کوپ 31’ (COP31) سربراہی اجلاس بیرونی جارحیت کے نتیجے میں پیدا ہونے والے ماحولیاتی اثرات کو عالمی سطح پر اجاگر کرنے کا ایک بہترین موقع ہے۔ انہوں نے واضح کیا کہ اس عالمی کانفرنس کے دوران ایران اور مشرقِ وسطیٰ کے خطے کو درپیش شدید ماحولیاتی نقصانات کا معاملہ بھرپور انداز میں اٹھایا جائے گا۔

ایرانی صدر نے سخت الزام عائد کیا کہ امریکا اور اسرائیل کی عسکری جارحیت سے ایران سمیت پورے خطے کے قدرتی ماحول اور ماحولیاتی نظام کو ناقابلِ تلافی نقصان پہنچا ہے۔ مسعود پزشکیان کا مزید کہنا تھا کہ حالیہ یورپی انتخابات کے نتائج بھی اس بات کا واضح ثبوت ہیں کہ عوام نے جنگ کے حامیوں اور جارحانہ پالیسیوں کے علمبرداروں کے مؤقف کے برعکس فیصلہ سنایا ہے۔