سندھ کے ضلع خیرپور میں گیس اور تیل کے بڑے ذخائر دریافت

پاکستان میں توانائی کے شعبے سے بڑی خبر سامنے آئی ہے جہاں آئل اینڈ گیس ڈویلپمنٹ کمپنی لمیٹڈ (او جی ڈی سی ایل) نے سندھ کے ضلع خیرپور میں گیس اور تیل کے نئے ذخائر دریافت کرنے کا باضابطہ اعلان کر دیا ہے۔

او جی ڈی سی ایل نے پاکستان اسٹاک ایکسچینج (PSX) کو خط کے ذریعے آگاہ کیا ہے کہ خیرپور میں واقع ‘بٹریسم نارتھ ویسٹ ون’ (Betrism NW-1) کنویں سے گیس اور کنڈینسیٹ کی دریافت ہوئی ہے۔ کمپنی کے مطابق ابتدائی جانچ کے دوران اس کنویں سے یومیہ 12.8 ملین معیاری مکعب فٹ گیس اور 175 بیرل کنڈینسیٹ حاصل ہوا ہے، یہ اہم دریافت لوئر گورو فارمیشن کے بیسل سینڈز میں ہوئی ہے۔

کمپنی ترجمان نے بتایا کہ اس کنویں کی ڈرلنگ کا آغاز 21 اگست 2026 کو کیا گیا تھا اور اسے 3,732 میٹر کی گہرائی تک کھودا گیا۔ او جی ڈی سی ایل اس ایکسپلوریشن لائسنس میں 95 فیصد حصص کے ساتھ آپریٹر ہے جبکہ گورنمنٹ ہولڈنگز پرائیویٹ لمیٹڈ (GHPL) کے پاس 5 فیصد حصص ہیں۔ او جی ڈی سی ایل کے مطابق اس نئے ذخیرے کو ہنگامی بنیادوں پر قومی گیس کے نیٹ ورک میں شامل کیا جا رہا ہے جس سے ملکی توانائی بحران پر قابو پانے میں مدد ملے گی۔