سندھ کے ضلع خیرپور میں گیس اور تیل کے بڑے ذخائر دریافت

پاکستان میں توانائی کے شعبے میں اہم پیش رفت سامنے آئی ہے، جہاں آئل اینڈ گیس ڈویلپمنٹ کمپنی لمیٹڈ (او جی ڈی سی ایل) نے سندھ کے ضلع خیرپور میں گیس اور تیل کے نئے ذخائر دریافت کرنے کا باقاعدہ اعلان کیا ہے۔ پاکستان سٹاک ایکسچینج (PSX) کو بھیجے گئے خط میں کمپنی نے بتایا کہ خیرپور کے بٹریسم نارتھ ویسٹ ون کنویں کی جانچ کے دوران یومیہ 12.8 ملین معیاری مکعب فٹ گیس اور 175 بیرل کنڈینسیٹ کی پیداوار حاصل ہوئی ہے۔ اس کنویں کی کھدائی 21 اگست 2026ء کو شروع کر کے 3 ہزار 732 میٹر گہرائی تک مکمل کی گئی۔ او جی ڈی سی ایل 95 فیصد حصص کے ساتھ اس ایکسپلوریشن بلاک کا آپریٹر ہے، جبکہ 5 فیصد حصص گورنمنٹ ہولڈنگز پرائیویٹ لمیٹڈ (GHPL) کے پاس ہیں۔ کمپنی نے اعلان کیا ہے کہ نئے ذخائر کو جلد از جلد قومی گیس گرڈ سے منسلک کیا جائے گا تاکہ ملکی توانائی کی طلب و رسد میں حائل خلا کو کم کیا جا سکے۔