عدالت نے لکی مروت کے شہری کا اسلام آباد کا ڈومیسائل بنانے کی ہدایت کر دی

اسلام آباد ہائیکورٹ نے لکی مروت کے شہری حماد اللہ کی ڈومیسائل بنانے کی درخواست پر سماعت کے دوران ضلعی انتظامیہ کے رویے پر شدید برہمی کا اظہار کرتے ہوئے ڈی سی آفس کو 5 روز کے اندر شہری کا ڈومیسائل جاری کرنے کی ہدایت کی ہے۔ سماعت کے دوران چیف جسٹس سرفراز ڈوگر کی عدالت میں ڈی سی، اے سی یا کسی ذمہ دار افسر کے بجائے جونیئر کلرک کے پیش ہونے پر چیف جسٹس نے سخت برہمی کا اظہار کرتے ہوئے کہا کہ “نواب کے بچوں نے خود آنے کے بجائے کلرک کو بھیج دیا ہے”۔ ضلعی انتظامیہ کے این او سی کے بعد ایک سال کے انتظار کے مؤقف کو مسترد کرتے ہوئے چیف جسٹس نے حکم دیا کہ اگر 5 دنوں میں شہری کو ڈومیسائل نہ بنا کر دیا گیا تو ڈپٹی کمشنر (ڈی سی) ذاتی حیثیت میں عدالت میں پیش ہوں، جس کے بعد کیس کی سماعت اگلے ہفتے تک ملتوی کر دی گئی۔