کرک میں پولیس چیک پوسٹ پر رات گئے دہشت گردوں کا حملہ ناکام

خیبرپختونخوا کے ضلع کرک میں واقع پولیس چیک پوسٹ چنغوص پر مسلح دہشت گردوں کا رات گئے کیا گیا ایک بڑا حملہ پولیس نے ناکام بنا دیا ہے۔ ڈسٹرکٹ پولیس آفیسر (ڈی پی او) کرک فضل واحد کے مطابق حملہ آوروں نے رات کی تاریکی کا فائدہ اٹھاتے ہوئے بھاری ہتھیاروں سے فائرنگ کی، جس پر وہاں تعینات پولیس جوانوں نے شدید جوابی کارروائی کی۔ فائرنگ کا یہ تبادلہ صبح تک جاری رہا، جس کے بعد دہشت گرد پسپا ہو کر فرار ہونے پر مجبور ہو گئے۔ ڈی پی او نے بتایا کہ بھاری ہتھیاروں کی زد میں آنے سے چیک پوسٹ کی عمارت کو جزوی نقصان پہنچا ہے تاہم تمام اہلکار محفوظ رہے۔ واقعے کے بعد پورے علاقے کا محاصرہ کر کے سرچ آپریشن شروع کر دیا گیا ہے، جس کے دوران بم ڈسپوزل یونٹ نے ایک آئی ای ڈی (IED) بھی برآمد کر لی ہے۔