وزیراعظم کا متوقع دورہ روس، تعلقات کو اگلے مرحلے میں لے جانے کا موقع

پاکستان اور روس کے تعلقات ایک نئے اور اہم موڑ میں داخل ہو رہے ہیں، جہاں گرمجوش سیاسی اور سفارتی روابط کو حقیقی اقتصادی و تجارتی شراکت داری میں بدلنے کے لیے وزیراعظم شہباز شریف کا دسمبر کے پہلے ہفتے میں دورۂ روس متوقع ہے۔

ماہرینِ امورِ خارجہ اور تجارتی حلقوں کے مطابق اس دورے کے دوران صدر ولادیمیر پوتن اور وزیراعظم شہباز شریف کے درمیان اہم ملاقات میں تجارت، توانائی، سرمایہ کاری، بینکاری، ویزا سہولیات، ٹرانسپورٹ اور براہِ راست فضائی و تجارتی روابط سے متعلق دیرینہ درپیش رکاوٹوں پر پیش رفت کی جائے گی۔ مالی سال 2025ء کے دوران دونوں ممالک کے درمیان دوطرفہ تجارت کا حجم صرف 243.412 ملین ڈالر رہا، جو کہ دونوں ممالک کی آبادی اور اقتصادی صلاحیت کے مقابلے میں ناافی ہے۔

اس دورے کی ایک اہم پیش رفت ‘پاکستان روس بزنس فورم’ کا انعقاد ہو گا، جس میں روس میں پاکستان کے سفیر فیصل نیاز ترمذی کے مطابق 100 سے زائد پاکستانی کمپنیاں شرکت کر کے روسی کاروباری اداروں سے براہِ راست B2B معاہدے کریں گی۔ اس کے علاوہ اقتصادی تعاون کے لیے 2030ء تک کا روڈ میپ اور دیگر 8 سے 10 اہم مفاہمتی یادداشتوں پر دستخط بھی زیرِ غور ہیں تاکہ ویزا مسائل کے حل اور محفوظ بینکنگ چینلز کا قیام یقینی بنایا جا سکے۔