بلوچستان کے ضلع کیچ میں سکیورٹی فورسز کا آپریشن، 2 دہشت گرد ہلاک

سکیورٹی فورسز نے بلوچستان کے ضلع کیچ میں انٹیلی جنس معلومات پر مبنی ایک کامیاب آپریشن کرتے ہوئے 2 دہشت گردوں کو ہلاک کر دیا ہے۔

سکیورٹی ذرائع کے مطابق، سکیورٹی فورسز نے ضلع کیچ کے علاقے دشت اور بال نگور میں دہشت گردوں کی موجودگی کی خفیہ اطلاح پر انٹیلی جنس بیسڈ آپریشن (IBO) کیا۔ اس دوران سکیورٹی فورسز اور دہشت گردوں کے درمیان شدید فائرنگ کا تبادلہ ہوا، جس کے نتیجے میں 2 دہشت گرد موقع پر ہی مارے گئے۔

آپریشن کے دوران ہلاک ہونے والے دہشت گردوں کی تحویل سے جدید اٹومیٹک اسلحہ، گولہ بارود، کمیونیکیشن آلات اور نقدی برآمد کی گئی، جس میں عام بلوچ شہریوں سے لوٹی گئی رقم بھی شامل ہے۔ واقعے کے فوراً بعد سکیورٹی فورسز نے علاقے کو گھیرے میں لے کر سرچ اور کلیئرنس آپریشن شروع کر دیا ہے تاکہ مزید ممکنہ شرپسندوں کا خاتمہ کیا جا سکے۔