ملک کے بالائی علاقوں میں آج سے بارشوں اور پہاڑوں پر برفباری کی پیشگوئی

محکمہ موسمیات نے 10 سے 14 نومبر کے دوران ملک کے بالائی اور شمالی علاقوں میں تیز ہواؤں اور گرج چمک کے ساتھ بارشوں جبکہ بلند پہاڑی سلسلوں پر برفباری کی پیشگوئی کی ہے۔ محکمہ موسمیات کے مطابق مغربی ہواؤں کا نیا سلسلہ ملک کے مغربی اور شمالی حصوں پر اثر انداز ہو رہا ہے، جس کے تحت خیبر پختونخوا، گلگت بلتستان، آزاد کشمیر، اسلام آباد، مری اور گلیات میں وقفے وقفے سے بارش کا امکان ہے۔ پنجاب کے مختلف اضلاع بشمول لاہور، گوجرانوالہ، سیالکوٹ، سرگودھا اور ملتان میں 12 اور 13 نومبر کے دوران بارش کی توقع کی جا رہی ہے۔ موسمیاتی حکام نے پہاڑی علاقوں میں سڑکوں پر پھسلن اور بندش کے خدشے کے پیشِ نظر مسافروں کو محتاط رہنے کی ہدایت کی ہے، جبکہ کسانوں کو بھی اپنی فصلوں کی بروقت حفاظت سے متعلق ضروری اقدامات کا مشورہ دیا گیا ہے۔