غزہ میں بارشوں سے 70 ہزار خیمے زیر آب، ساڑھے 3 لاکھ بے گھر افراد متاثر

غزہ پٹی میں ہونے والی شدید بارشوں کے باعث بے گھر افراد کے 70 ہزار خیمے زیرِ آب آ گئے ہیں، جس سے ساڑھے 3 لاکھ سے زائد فلسطینی شدید متاثر ہوئے ہیں۔ حماس نے خیموں کے جل تھل ہونے اور انسانی بحران میں اضافے کو اسرائیلی محاصرے اور امدادی سامان پر عائد پابندیوں کا نتیجہ قرار دیا ہے۔ حماس کے ترجمان نے اپنے بیان میں کہا کہ اسرائیل اور بین الاقوامی امن کونسل بے گھر افراد کی ان مشکلات کے ذمہ دار ہیں کیونکہ اسرائیل ہنگامی پناہ گاہوں، گرمائش کے سامان اور مرمتی مواد کی فراہمی مسلسل روک رہا ہے۔ حماس نے عالمی برادری اور ثالث ممالک سے مطالبہ کیا ہے کہ بے گھر خاندانوں کو خیموں کے بجائے محفوظ پناہ گاہیں فراہم کی جائیں اور غزہ میں فوری طور پر درکار 3 لاکھ خیموں سمیت دیگر ضروری امدادی سامان کی مسلسل فراہمی یقینی بنائی جائے۔