وزیراعلیٰ پنجاب کے دورہ لندن کے اخراجات کی تفصیل دی جائے، پنجاب اسمبلی میں تحریک التوا جمع

پنجاب اسمبلی میں وزیراعلیٰ پنجاب مریم نواز کے دورہ لندن کے اخراجات اور سرکاری طیارے کے استعمال کی تفصیلات ایوان میں بحث کے لیے لانے کی درخواست پر مشتمل تحریک التوا جمع کروا دی گئی ہے۔

اپوزیشن رکن پنجاب اسمبلی وقاص محمود کی جانب سے جمع کروائی گئی تحریک التوا میں موقف اختیار کیا گیا ہے کہ وزیراعلیٰ مریم نواز نے اپنے دورہ لندن کے لیے پنجاب حکومت کا طیارہ استعمال کیا۔ تحریک التوا کے مطابق 17 ستمبر 2026 کو سفری اخراجات کی مد میں 2 کروڑ 71 لاکھ 94 ہزار 4 روپے کی رقم بذریعہ عمر عباس چیک کے ذریعے جمع کروائی گئی، تاہم جس اکاؤنٹ سے رقم جمع کروائی گئی اس کے اکاؤنٹ ہولڈر اور تفصیلات کو عام نہیں کیا گیا۔

تحریک التوا میں مزید کہا گیا ہے کہ پنجاب حکومت نے سرکاری جہاز کے استعمال کے حوالے سے ہمیشہ متضاد بیانات دیے ہیں۔ اس کے علاوہ طیارے کو اڑانے کے لیے دو غیر ملکی پائلٹس بھی خدمات انجام دے رہے ہیں جن کی مجموعی ماہانہ تنخواہ تقریباً 70 ہزار امریکی ڈالر بنتی ہے۔ تحریک میں ایوان کی کارروائی روک کر وزیراعلیٰ کے دورہ لندن کے تمام اخراجات اور سرکاری جہاز کی تفصیلات پر بحث کی اجازت دینے کا مطالبہ کیا گیا ہے۔