افغان وزیر داخلہ سراج الدین حقانی کے ذاتی محافظ کو قتل کردیا گیا

افغانستان کے عبوری وزیر داخلہ سراج الدین حقانی کے ذاتی محافظ کو صوبہ بغلان میں نامعلوم افراد نے گولیاں مار کر قتل کر دیا۔

افغان میڈیا کی رپورٹس کے مطابق سراج الدین حقانی کے قریبی اور ذاتی محافظوں میں شامل اہلکار کی گولیوں سے چھلنی لاش صوبہ بغلان میں سڑک کے کنارے سے برآمد ہوئی۔ مقتول کی شناخت قاری نور جان احمدزئی کے نام سے ہوئی ہے جو اپنے جہادی نام ‘طیب بدری’ کے سے جانا جاتا تھا۔

افغان ذرائع ابلاغ نے بتایا کہ قاری نور جان احمدزئی کا تعلق صوبہ بغلان سے ہی تھا اور وہ چند روز کی چھٹی پر اپنے اہلخانہ سے ملاقات کے لیے گھر آیا ہوا تھا جہاں اسے نشانہ بنایا گیا۔ طالبان حکام نے واقعے کی تحقیقات شروع کر دی ہیں، تاہم تاحال کسی بھی گروپ نے اس قتل کی ذمہ داری قبول نہیں کی ہے۔