دبئی کے پرفیوم برانڈ نے گنیز ورلڈ ریکارڈ اپنے نام کر لیا

دبئی کے معروف عطر ساز گروپ رصاصی (Rasasi) کے نئے لگژری برانڈ ‘کنز ڈی رصاصی’ نے اپنے نئے بین الاقوامی عطر ’’ہاوس فراسٹ‘‘ (Hawas Frost) کی منفرد لانچنگ کے ذریعے گنیز ورلڈ ریکارڈ اپنے نام کر لیا ہے।

برانڈ نے 2 نومبر کو نیپال میں واقع ماؤنٹ ایورسٹ کے علاقے میں 5 ہزار 170 میٹر کی ریکارڈ بلندی پر عطر متعارف کروا کر دنیا کے بلند ترین مقام پر پرفیوم لانچ کرنے کا تاریخی ریکارڈ قائم کیا۔ اس کے بعد دبئی میں برج خلیفہ کی عمارت پر ایک منٹ پر مشتمل خصوصی لائٹ شو کے ذریعے اس عطر کی عالمی رونمائی کی گئی، جس میں دنیا کی بلند ترین عمارت کو مجازی طور پر برف سے ڈھکتے ہوئے دکھایا گیا۔ تقریب کے دوران گنیز ورلڈ ریکارڈز کی سینئر جج کنزی الدفراوی نے رصاصی گروپ کی انتظامیہ کو باضابطہ سرٹیفکیٹ پیش کیا۔

تقریب کی ایک اہم خصوصیت عطر کی پہلی اور تاریخی بوتل ’’کیری نمبر 001‘‘ کی نیلامی تھی، جس نے ایورسٹ سے برج خلیفہ تک کا سفر طے کیا تھا۔ نیلامی سے حاصل ہونے والی 2 لاکھ 60 ہزار درہم کی رقم دبئی کی فلاحی تنظیم ‘دبئی کیئرز’ (Dubai Cares) کو عطیہ کی گئی، جو بچوں اور نوجوانوں کی تعلیم و تربیت پر خرچ ہوگی۔ کنز ڈی رصاصی کے شریک بانی اسماعیل انیس نے اس کامیابی کو کمپنی اور دبئی دونوں کے لیے اعزاز قرار دیا۔