اردوان کا ٹرمپ سے رابطہ، ایران امریکا کشیدگی سفارتکاری سے حل کرنے پر زور

ترکیہ کے صدر رجب طیب اردوان نے اپنے امریکی ہم منصب ڈونلڈ ٹرمپ سے ٹیلی فونک گفتگو کرتے ہوئے واضح کیا ہے کہ ترکیہ خطے اور عالمی سطح پر امن کے قیام کے لیے اپنی سفارتی کوششیں بلا تعطل جاری رکھے گا۔

ترک صدارتی دفتر کی جانب سے جاری کردہ باضابطہ بیان کے مطابق، صدر اردوان نے امریکی صدر ڈونلڈ ٹرمپ پر زور دیا کہ ایران اور امریکا کے درمیان بڑھتی ہوئی کشیدگی کو جنگ کے بجائے صرف اور صرف سفارت کاری اور بات چیت کے ذریعے حل کیا جانا چاہیے۔ انہوں نے کہا کہ عالمی مسا ئل کے دیرپا حل کے لیے سفارتی ذرائع اور مذاکراتی عمل کو ہی اولین ترجیح ملنی چاہیے۔

ترک صدر رجب طیب اردوان نے مزید کہا کہ ترکیہ یوکرین اور روس کے درمیان جاری جنگ کے خاتمے کے لیے بھی اپنے وساطتی کردار پر عمل پیرا رہے گا۔ اس مقصد کو حاصل کرنے کے لیے ماسکو اور کیئو کے ساتھ مشاورتی عمل اور رابطوں کو مزید بڑھانے کی ضرورت ہے۔ صدر اردوان نے اس عزم کا اعادہ کیا کہ انقرہ خطے میں پائیدار امن، استقرار اور بحرانوں کے حل کے لیے اپنا مؤثر اور مثبت سفارتی کردار ادا کرتا رہے گا۔