ایران پر دوبارہ حملہ کیا تو امریکا کو تباہ کن جواب دیں گے: محسن رضائی

ایران کی قومی سلامتی کونسل کے سربراہ محسن رضائی نے امریکا کو سخت خبردار کرتے ہوئے کہا ہے کہ اگر امریکا نے ایران پر دوبارہ حملہ کرنے کی حماقت کی تو اس کا جواب انتہائی تباہ کن اور ہولناک ہوگا، جس کے بعد واشنگٹن کو شدید پچھتاوا ہو گا۔

تہران میں ایرانی میڈیا اور صحافیوں سے گفتگو کرتے ہوئے محسن رضائی کا کہنا تھا کہ موجودہ امریکی قیادت اس وقت شدید سیاسی انتشار اور بے یقینی کی صورتحال کا شکار ہے، اور یہ بات تک واضح نہیں ہے کہ واشنگٹن میں مذاکرات کی میز پر آخر کس کے ساتھ بات چیت کی جائے۔ انہوں نے دعویٰ کیا کہ امریکی نائب صدر جے ڈی وینس بھی اپنے بیانات میں اندرونی بحرانوں کا اعتراف کر چکے ہیں، جبکہ امریکی وزیر خارجہ مارکو روبیو کی عہدے سے رخصتی قریب دکھائی دیتی ہے اور امریکی وزیر دفاع پیٹ ہیگستھ کو بھی جلد ان کے عہدے سے برطرف کیے جانے کا قوی امکان ہے کیونکہ انتظامیہ تقسیم کا شکار ہے۔

سربراہ ایرانی قومی سلامتی کونسل نے اپنے بیان میں امریکی سینٹرل کمانڈ (سینٹکام) کے سربراہ ایڈمرل بریڈ کوپر کو بھی شدید تنقید کا نشانہ بناتے ہوئے کہا کہ ایک سنگین فوجی کمانڈر ہونے کے بجائے ایڈمرل بریڈ کوپر پوڈ کاسٹر بن چکے ہیں اور صرف میڈیا بیانات تک محدود ہیں۔ ایران اپنی سلامتی اور دفاع پر کوئی سمجھوتہ نہیں کرے گا اور کسی بھی امریکی مہم جوئی کا منہ توڑ جواب دیا جائے گا۔