ایس ایم ای برآمد کنندگان کے لیے 300 ارب روپے مختص کرنے کا فیصلہ

وزارتِ خزانہ نے چھوٹے اور درمیانے درجے کے کاروباری اداروں (SMEs) کے برآمد کنندگان کی سہولت اور ملکی برآمدات میں تیز رفتار اضافے کے لیے اہم ترین ریلیف کا اعلان کرتے ہوئے پاک ایکسپورٹ امپورٹ بینک (پاک ایگزیم بینک) کے تحت 300 ارب روپے کا پورا ایکسپورٹ فنانس فنڈ ایس ایم ایز کے لیے مختص کر دیا ہے۔

وزارتِ خزانہ کی جانب سے جاری تفصیلات کے مطابق اس سے قبل مختلف کاروباری شعبوں میں تقسیم کی جانے والی فنانس اسکیم کی 300 ارب روپے کی تمام تر رقم اب صرف اور صرف چھوٹے اور درمیانے درجے کے برآمد کنندگان کے لیے مخصوص ہو گی۔ اس اقدام کے تحت ایس ایم ای سیکٹر کو کم ترین شرحِ سود پر مالی معاونت دستیاب ہوگی، جس سے انہیں اپنے کاروباری آپریشنز کو وسعت دینے اور عالمی منڈیوں میں پاکستانی برآمدات کا حجم بڑھانے کا موقع ملے گا۔

حکام کا مزید کہنا ہے کہ مالی سال 27-2026 کے بجٹ میں ٹیکسوں میں کمی اور مراعاتی پیکیج کے ذریعے بزنس کمیونٹی پر بوجھ کم کرنے کی پالیسی کا سلسلہ جاری ہے۔ پاک ایگزیم بینک نے ملک بھر کے تجارتی بینکوں کو ہدایت جاری کی ہے کہ اس 300 ارب روپے کی اسکیم پر فوری اور مؤثر عمل درآمد یقینی بنایا جائے تاکہ روزگار کے نئے مواقع پیدا ہو سکیں اور صنعتی ترقی کو فروغ ملے۔