فرانس میں یونینز اور طلبہ تنظیموں کا ایک اور احتجاجی مظاہرے کا اعلان

فرانس میں مہنگائی اور اخراجاتِ زندگی میں مسلسل اضافے کے خلاف حالات کشیدہ ہو گئے ہیں، جہاں یونینز اور طلبہ تنظیموں کی جانب سے ایک اور ملک گیر احتجاجی مظاہرے کے اعلان کے بعد حکومت نے اعلیٰ سکیورٹی الرٹ جاری کرتے ہوئے ملک بھر میں 70 ہزار پولیس اور سکیورٹی اہلکار تعینات کر دیے ہیں۔

فرانسیسی وزارتِ داخلہ کے مطابق 17 اکتوبر کے پرتشدد ہنگاموں کے بعد امن و امان کی صورتحال برقرار رکھنے کے لیے سکیورٹی سخت کی گئی ہے۔ اس کے باوجود ‘یلو ویسٹ’ (Yellow Vests) تحریک نے دارالحکومت پیرس میں حکومتی پابندیوں اور سکیورٹی خدشات کو نظر انداز کرتے ہوئے الگ احتجاجی ریلی نکالنے کا باضابطہ اعلان کر دیا ہے جس سے تصادم کا خطرہ بڑھ گیا ہے۔

عالمی خبر رساں ایجنسیوں کی رپورٹ کے مطابق جمعرات کو ہونے والے حالیہ مظاہروں کے دوران سکیورٹی فورسز نے 642 افراد کو گرفتار کیا، جبکہ مظاہروں اور جھڑپوں کی کوریج کرنے والے صحافیوں پر تشدد کے 21 واقعات بھی رپورٹ ہوئے ہیں۔ فرانس میں گزشتہ ماہ سے شروع ہونے والی اس احتجاجی لہر کے باعث پورے ملک میں کاروباری اور عمومی زندگی شدید متاثر ہے۔