ورلڈ کلچر فیسٹیول کا دسواں روز بھی رنگارنگ سرگرمیوں اور ثقافتی پرفارمنس سے بھرپور

آرٹس کونسل آف پاکستان کراچی میں جاری تیسرے ‘ورلڈ کلچر فیسٹیول’ کی رنگارنگ اور پرجوش سرگرمیاں دسویں روز بھی کامیابی سے جاری رہیں، جس میں بین الاقوامی فنکاروں نے اپنے فن کا مظاہرہ کر کے شائقین کو سحر انگیز کر دیا۔

فیسٹیول کے دسویں روز تھائی لینڈ کے روایتی اور کلاسیکی رقص سے متعلق ایک خصوصی تربیت ورکشاپ کا انعقاد کیا گیا، جس میں تھائی لینڈ کے شہرہ آفاق ڈانس گروپ ‘نتایا چولا’ نے شرکاء کو تھائی لینڈ کے صدیوں پرانے شاہی اور کلاسیکی رقص کے گر سکھائے۔ روایتی ملبوسات زیب تن کیے تھائی فنکاروں نے ہاتھوں کے پیچیدہ اور خوبصورت انداز سے رقص کی باریکیاں پیش کیں، جس میں مقامی طلباء اور غیر ملکی فنکاروں نے بھی بھرپور شرکت کی اور تھائی الثقافت کے رنگوں کو سراہا۔

علاوہ ازیں، دسویں روز کا آغاز ‘آربٹ ڈانس بیٹل’ کے آڈیشن راؤنڈ سے ہوا جس کی میزبانی ناروے کے معروف ڈانسر نوید رضوانی نے کی۔ ناروے کی ڈی جے کیتھرین کی ہپ ہاپ بیٹس پر نوجوانوں نے بہترین رقص کا مظاہرہ کیا، جبکہ مانی چاؤ، نگہت چوہدری اور لوکاس ڈیوین پر مشتمل جیوری نے ججز کے فرائض انجام دیے۔ سنسنی خیز مقابلوں کے بعد آربٹ ڈانس بیٹل کا گرینڈ فائنل کل منعقد ہوگا۔