گورنر خیبرپختونخوا کا پشاور سے لاہور براہِ راست فضائی سروس شروع کرنے کا اعلان

خیبر پختونخوا کے عوام کے لیے ایک بڑی اور خوش آئند خبر سامنے آئی ہے؛ گورنر خیبر پختونخوا فیصل کریم کنڈی نے 9 نومبر (یومِ اقبال) سے پشاور اور لاہور کے درمیان براہِ راست فضائی سروس کے باقاعدہ آغاز کا اعلان کر دیا ہے۔

گورنر فیصل کریم کنڈی نے میڈیا سے گفتگو کرتے ہوئے بتایا کہ ‘ساؤتھ ایئرویز’ کے تعاون سے پشاور اور لاہور کے مابین فضائی رابطہ بحال کیا جا رہا ہے۔ انہوں نے کہا کہ اس فضائی سروس کے ذریعے پشاور سے لاہور کا سفر اب محض 50 منٹ سے ایک گھنٹے میں طے ہو جائے گا۔ ابتدائی مرحلے میں اس روٹ پر ہفتے میں 4 پروازیں چلائی جائیں گی، جبکہ پہلی پرواز 9 نومبر کو دوپہر تقریباً ایک بجے پشاور سے لاہور کے لیے روانہ ہو گی۔

گورنر خیبر پختونخوا کا کہنا تھا کہ اس اقدام سے لاہور میں مقیم صوبے کے شہریوں، تاجروں اور سرکاری ملازمین کو بہترین اور تیز ترین سفری سہولیات میسر آئیں گی۔ انہوں نے مزید کہا کہ پشاور سے کوئٹہ کے لیے بھی براہِ راست پروازیں کامیابی کے ساتھ جاری ہیں، جبکہ ڈیرہ اسماعیل خان، چترال اور پاراچنار کے لیے بھی فضائی رابطے بحال کرنے پر کام جاری ہے۔ انہوں نے عزم ظاہر کیا کہ صوبے کے تمام خطوں کو فضائی راستوں کے ذریعے جوڑنے اور پشاور کو ایک بار پھر ‘پھولوں کا شہر’ بنانے کے لیے عملی اقدامات جاری رکھے جائیں گے۔