نیویارک سٹی میراتھن میں نوجوان خاتون رنر فنش لائن کے قریب گر کر ہلاک

امریکی ریاست پنسلوانیا سے تعلق رکھنے والی 24 سالہ خاتون رنر نیویارک سٹی میراتھن کے دوران فنش لائن سے محض 2 میل کی دوری پر اچانک گر کر ہلاک ہو گئی۔

غیر ملکی میڈیا کے مطابق 24 سالہ ریچل پارکنسنز بیماری کی تحقیق کے لیے فنڈز جمع کرنے کی خاطر اپنے دادا کے اعزاز میں پہلی بار 26.2 میل پر مشتمل نیویارک سٹی میراتھن دوڑ میں حصہ لے رہی تھی۔ پولیس حکام نے بتایا کہ وہ مقصد کے انتہائی قریب یعنی فنش لائن سے صرف 2 میل کی مسافت پر تھی کہ اچانک بے ہوش ہو کر گر پڑی۔ اسے فوری طور پر تشویشناک حالت میں نزدیکی ہسپتال منتقل کیا گیا جہاں ڈاکٹروں نے کئی گھنٹوں تک اس کی جان بچانے کی کوششیں کیں لیکن وہ جانبر نہ ہو سکی۔

ریچل کے والد کے مطابق وہ ایک غیر معمولی طبی حالت ‘رابڈومائلیسس’ (Rhabdomyolysis) کا شکار ہو گئی تھی، جس میں شدید جسمانی مشقت کے باعث جسم کے پٹھے (Muscles) تیزی سے ٹوٹنا شروع ہو جاتے ہیں۔ اس ناگہانی واقعے نے میراتھن میں شرکت کرنے والے دیگر ڈوراکوں اور مقامی برادری کو گہرے صدمے میں مبتلا کر دیا ہے۔