متحدہ عرب امارات میں فجیرہ کے ساحل کے قریب زلزلے کے جھٹکے محسوس

متحدہ عرب امارات (UAE) کی ریاست فجیرہ کے ساحلی علاقے کے قریب 2.3 شدت کا ہلکی نوعیت کا زلزلہ ریکارڈ کیا گیا ہے۔

امارات کے نیشنل سینٹر آف میٹرولوجی (NCM) کے جاری کردہ اعداد و شمار کے مطابق، زلزلہ بدھ کے روز فجیرہ کے ساحل کے قریب زیرِ زمین محسوس کیا گیا، جس کی شدت ریکٹر اسکیل پر 2.3 تھی۔ ادارے کے نیشنل سیسمک نیٹ ورک کے ذریعے اس زلزلے کی لہروں اور زیرِ زمین تحرک کی مسلسل نگرانی کی گئی۔

واضح رہے کہ اس سے قبل 16 اکتوبر کو بھی فجیرہ کے قریبی علاقے دبہ کے پاس 1.6 شدت کا کم درجے کا زلزلہ ریکارڈ کیا گیا تھا۔ حکام اور مقامی انتظامیہ کی جانب سے اس زلزلے کے نتیجے میں کسی بھی قسم کے جانی یا مالی نقصان کی کوئی اطلاع موصول نہیں ہوئی ہے۔