قلعہ عبداللہ کا واقعہ اسلامی، پشتون اور بلوچ روایات کے منافی ہے: وزیر داخلہ بلوچستان

وزیر داخلہ بلوچستان میر ضیاء اللہ لانگو نے ضلع قلعہ عبداللہ کے علاقے جنگل پیر علیزئی میں جاری دھرنے کے شرکاء سے خطاب کرتے ہوئے سانحہ قلعہ عبداللہ کی شدید الفاظ میں مذمت کی اور متاثرین سے دلی ہمدردی کا اظہار کیا۔

انہوں نے اپنے خطاب میں کہا کہ قلعہ عبداللہ کا واقعہ اسلامی، پشتون اور بلوچ روایات کے بالکل منافی ہے۔ ہماری قدیم اور شاندار روایات میں جنگ کے دوران بھی گھروں، خواتین اور بچوں کو مکمل استثنیٰ حاصل ہوتا ہے، لہٰذا جو عناصر خواتین اور بچوں کو نشانہ بناتے ہیں وہ بلوچ و پشتون معاشرے کا حصہ نہیں ہو سکتے۔ صوبائی وزیر داخلہ نے سیاسی مخالفین پر تنقید کرتے ہوئے کہا کہ بعض سیاسی جماعتیں ایسے المناک واقعات کو اپنے سیاسی مقاصد کے لیے استعمال کرتی ہیں اور دہشت گردی کا تمام تر ملبہ حکومت پر ڈال کر عوام کو گمراہ کرنے کی کوشش کرتی ہیں، حالانکہ سانحہ زیارت میں شہید ہونے والے پولیس اہلکار بھی ریاست کے اپنے جوان تھے۔

میر ضیاء اللہ لانگو نے کہا کہ عوام کی جان و مال کا تحفظ حکومت کی اولین ترجیح ہے اور وہ خود بھی دہشت گردی کے ایک حملے کا نشانہ بن چکے ہیں۔ انہوں نے عوام اور سیاسی قیادت پر زور دیا کہ وہ دوغلے پن کا رویہ ترک کر کے متحد ہوں، دہشت گردوں کو کھلم کھلا دہشت گرد کہیں اور مہاجرین کی وطن واپسی سمیت ملک کو دہشت گردی اور منشیات کے ناسور سے پاک کرنے کے لیے ریاستی فیصلوں کا مکمل ساتھ دیں۔