گجرات میں گیس لیکیج سے آتشزدگی کے باعث جھلسنے والے تینوں افراد جاں بحق

پنجاب کے ضلع گجرات کی تحصیل کھاریاں کے علاقے پنڈ عزیز میں گھر کے کچن میں گیس لیکیج کے باعث بھڑکنے والی آگ کے نتیجے میں شدید جھلسنے والے ایک ہی خاندان کے تینوں افراد دورانِ علاج دم توڑ گئے۔

ریسکیو ذرائع اور ہسپتال انتظامیہ کے مطابق افسوسناک واقعہ تین روز قبل اس وقت پیش آیا تھا جب مکان کے کچن میں گیس لیکیج کی وجہ سے اچانک آگ بھڑک اٹھی، جس نے دیکھتے ہی دیکھتے پورے کمرے کو اپنی لپیٹ میں لے لیا۔ حادثے کے نتیجے میں ایک مرد اور دو خواتین شدید طور پر جھلس گئے تھے، جنہیں ریسکیو 1122 کی مدد سے فوری طور پر ڈی ایچ کیو (DHQ) ہسپتال کھاریاں کے برن وارڈ منتقل کیا گیا تھا۔

طبی حکام نے تصدیق کی ہے کہ تینوں زخمی زخموں کی تاب نہ لاتے ہوئے دورانِ علاج زندگی کی بازی ہار گئے۔ جاں بحق ہونے والوں میں 25 سالہ زاہین زبیر، 38 سالہ تصور حسین اور 35 سالہ صائمہ شامل ہیں۔ ایک ہی گھر کے تین افراد کے انتقال پر علاقے کی فضا انتہائی سوگوار ہو گئی۔