اسحاق ڈار کا سعودی وزیر خارجہ سے رابطہ، علاقائی و عالمی صورتحال پر تبادلہ خیال

نائب وزیراعظم و وزیر خارجہ سینیٹر محمد اسحاق ڈار اور سعودی عرب کے وزیر خارجہ شہزادہ فیصل بن فرحان کے درمیان ٹیلیفونک رابطہ ہوا، جس میں مشرقِ وسطیٰ کی ابھرتی ہوئی صورتحال، علاقائی سیکیورٹی اور عالمی منظرنامے کے اہم امور پر تفصیلی تبادلہ خیال کیا گیا۔

ترجمان دفتر خارجہ کی جانب سے جاری بیان کے مطابق گفتگو کے دوران دونوں رہنماؤں نے خطے میں پائیدار امن، سیکیورٹی اور استحکام کے قیام کے لیے مسلسل سفارتی کوششوں اور باہمی مذاکرات کو ناگزیر قرار دیا۔ دونوں رہنماؤں نے علاقائی چیلنجز کے تناظر میں اعلیٰ سطحی رابطوں، باہمی مشاورت اور اسٹریٹجک ہم آہنگی کے سلسلے کو مسلسل جاری رکھنے پر کامل اتفاق کیا۔

ترجمان دفتر خارجہ کا مزید کہنا تھا کہ فریقین نے پاکستان اور سعودی عرب کے برادرانہ تعلقات کو مزید مستحکم بنانے کے عزم کو دہرایا اور تمام اہم عالمی و علاقائی موضوعات پر قریبی رابطہ برقرار رکھنے کا فیصلہ کیا۔