28 لاکھ 7 ہزار 250 افغان شہری وطن واپس بھجوائے جا چکے ہیں: محکمہ داخلہ پنجاب

حکومتِ پاکستان کی پالیسی کے تحت غیر قانونی طور پر مقیم تارکینِ وطن کے خلاف ملک گیر مہم کے دوران اب تک مجموعی طور پر 28 لاکھ 7 ہزار 250 افغان شہریوں کو وطن واپس بھجوایا جا چکا ہے، جبکہ صرف صوبہ پنجاب سے 1 لاکھ 43 ہزار 474 غیر قانونی افغان باشندوں کا انخلا مکمل کر لیا گیا ہے۔

محکمہ داخلہ پنجاب کے ترجمان کے مطابق صوبے میں اس وقت 39 ہولڈنگ سینٹرز فعال ہیں جہاں 153 افغان شہری موجود ہیں اور وہاں ان کی عارضی رہائش، رجسٹریشن اور وطن واپسی کی قانونی اقدامات جاری ہیں۔ ترجمان نے واضح کیا کہ بغیر ویزا پاکستان میں قیام غیر قانونی تصور کیا جاتا ہے اور ایسے افراد کو حراست میں لے کر ضروری کارروائی کے بعد طورخم بارڈر پر افغان حکام کے حوالے کر دیا جاتا ہے۔ مہم کے دوران پنجاب بھر کے رہائشی علاقوں اور مارکیٹس میں 4 لاکھ سے زائد سرچ آپریشنز کیے گئے، جبکہ غیر قانونی مقیم باشندوں کو جائیدادیں کرائے پر دینے کے الزام میں 803 مالکان کے خلاف مقدمات درج کیے جا چکے ہیں۔

ترجمان محکمہ داخلہ نے مزید بتایا کہ فارن نیشنل سیکیورٹی ونگ تمام کارروائیوں کی نگرانی اور بین الادارتی رابطہ کاری کا ذمہ دار ہے، جبکہ کارروائیوں کا ہدف صرف اور صرف غیر قانونی طور پر مقیم افراد ہیں۔ محکمہ داخلہ نے شہریوں سے اپیل کی ہے کہ غیر قانونی قیام، جعلی شناختی دستاویزات یا کسی بھی مشکوک سرگرمی کی اطلاع ایمرجنسی ہیلپ لائن 15 پر دیں تاکہ فوری کارروائی عمل میں لائی جا سکے۔