وفاقی کابینہ نے 10 روپے کا سکہ متعارف کروانے کی منظوری دیدی

وفاقی کابینہ نے مالیاتی و انتظامی امور سے متعلق متعدد اہم فیصلوں کی منظوری دیتے ہوئے 10 روپے کا کاغذ کا کرنسی نوٹ ختم کر کے اس کی جگہ نیا سکہ متعارف کروانے کی باضابطہ منظوری دے دی ہے۔ اس کے ساتھ ہی کابینہ نے وزارتِ خزانہ کی سفارشات پر عمل کرتے ہوئے ملک میں نئے کرنسی نوٹوں کے جدید ڈیزائنز کی بھی منظوری دے دی ہے۔

وزیراعظم کی زیرِ صدارت ہونے والے وفاقی کابینہ کے اہم اجلاس میں پاکستان اور کویت کے درمیان دوطرفہ دفاعی تعاون، عسکری شراکت داری اور تزویراتی تعلقات کو مزید مضبوط بنانے کے لیے اہم معاہدے کی توثیق کی گئی۔

علاوہ ازیں، اجلاس کے دوران اہم آئینی و انتظامی پیشرفت سامنے آئی جس کے تحت وفاقی کابینہ نے خیبر پختونخوا میں آئینی اور انتظامی امور کی بلا تعطل انجام دہی کے لیے وزیراعلیٰ خیبر پختونخوا کے بعض اہم اختیارات گورنر خیبر پختونخوا کو تفویض کرنے کی بھی باضابطہ منظوری دے دی ہے۔