ایران کے خلاف امریکی پالیسی حکومت بدلنے سے تبدیل نہیں ہوگی، مجتبیٰ خامنہ ای

ایران کے سپریم لیڈر مجتبیٰ خامنہ ای نے قوم کے نام اپنے اہم خطاب میں کہا ہے کہ امریکا گزشتہ سات دہائیوں سے ایران کی آزادی اور خودمختاری کے خلاف دشمنی اور تسلط کی پالیسی پر گامزن ہے، تاہم ایرانی قوم نے شدید دباؤ کے باوجود اپنے تحفظ کا کامیابی سے دفاع کیا ہے۔ انہوں نے 1953 میں حکومت کے تختے الٹنے سے لے کر اقتصادی پابندیوں اور عراق کی مدد تک کے تاریخی واقعات کا حوالہ دیتے ہوئے کہا کہ امریکا کے خلاف سفارتی یا مذاکراتی رعایتیں دینے سے اس کا دباؤ کم نہیں ہوگا کیونکہ واشنگٹن میں حکومتوں کی تبدیلی سے ایران مخالف پالیسی تبدیل نہیں ہوتی۔ ایرانی سپریم لیڈر نے دعویٰ کیا کہ آبنائے ہرمز میں حالیہ پیش رفت نے امریکی فوجی طاقت کی حدود واضح کر دی ہیں اور ثابت کیا ہے کہ امریکا ناقابل شکست نہیں۔ انہوں نے فلسطین، لبنان، عراق اور یمن کی مزاحمتی تحریکوں کے تعاون کی تعریف کرتے ہوئے ملکی نوجوانوں کو مایوسی ترک کرنے اور سائنسی و معاشی ترقی کے ذریعے قومی خودمختاری مضبوط بنانے کی تلقین کی۔