حکومت نے پٹرولیم مصنوعات کی قیمتوں میں کمی کردی

حکومتِ پاکستان نے عوام کو معمولی راحت فراہم کرتے ہوئے پیٹرولیم مصنوعات کی قیمتوں میں ردوبدل کا اعلان کیا ہے، جس کے تحت پیٹرول کی قیمت میں 5 روپے 45 پیسے فی لیٹر جبکہ ہائی اسپیڈ ڈیزل کی قیمت میں 3 روپے 68 پیسے فی لیٹر کمی کر دی گئی ہے۔

پٹرولیم ڈویژن کی جانب سے جاری کردہ رسمی نوٹیفکیشن کے مطابق قیمتوں میں کمی کے اس فیصلے کے بعد پیٹرول کی نئی قیمت 369 روپے 06 پیسے فی لیٹر مقرر ہو گئی ہے، جبکہ ہائی اسپیڈ ڈیزل کی قیمت 391 روپے 52 پیسے فی لیٹر ہو گئی ہے۔

وزارت کے جاری کردہ نوٹیفکیشن میں واضح کیا گیا ہے کہ پیٹرولیم مصنوعات کی ان نئی قیمتوں کا فوري طور پر اطلاق رات 12 بجے سے ہو چکا ہے، جو کہ 4 نومبر تک مؤثر رہیں گی۔ معاشی ماہرین کا کہنا ہے کہ اگرچہ پیٹرولیم مصنوعات کی قیمتوں میں اس کمی سے عوام کو ایک حد تک عارضی ریلیف ملے گا، تاہم ٹرانسپورٹ کے کرایوں اور عام روزمرہ اشیائے ضروریہ کی قیمتوں میں فوری کمی کا امکان انتہائی کم نظر آتا ہے۔