سپریم کورٹ بار کے انتخابات 27-2026 کے آفیشل نتائج جاری

سپریم کورٹ بار ایسوسی ایشن (SCBA) کے سال 2026-27ء کے سالانہ انتخابات کے باضابطہ آفیشل نتائج کا اعلان کر دیا گیا ہے، جس کے مطابق حامد خان گروپ اور اسما جہانگیر گروپ کے سخت مقابلے کے بعد سید امجد شاہ 2073 ووٹ حاصل کر کے سپریم کورٹ بار کے نئے صدر منتخب ہو گئے ہیں۔

الیکشن کمیشن کے جاری کردہ حتمی نتائج کے مطابق، سیکرٹری کی اہم نشست پر محمد عارف اعوان 1723 ووٹ لے کر کامیا ب قرار پائے جبکہ سائرہ خالد 1930 ووٹ حاصل کر کے ایڈیشنل سیکرٹری منتخب ہوئی ہیں۔ اس کے علاوہ، رائے اظہر اقبال کھرل 1893 ووٹ حاصل کر کے سپریم کورٹ بار ایسوسی ایشن کے نئے فنانس سیکرٹری منتخب ہوئے ہیں۔

صوبائی نائب صدور (Vice Presidents) کی نشستوں پر بلوچستان سے عبدالملک بلوچ اور خیبر پختونخوا سے حضرت سعید کامیاب ہوئے، جبکہ پنجاب سے محمد یاسین بھٹی اور سندھ سے جام آصف محمود لاڑ اپنے اپنے صوبوں سے نائب صدر منتخب ہو گئے ہیں۔

ایگزیکٹو کمیٹی کے نتائج کے تحت بلوچستان سے عصمت اللہ مندوخیل اور محمد علی کامیاب قرار پائے، جبکہ خیبر پختونخوا سے کاشف جان اور سید عزیز الدین کاکاخیل نے کامیابی حاصل کی۔ پنجاب (ملتان اور بہاولپور بنچز) سے سردار عاشق حسین بلوچ، چوہدری احمد مسعود اور صفیہ نورین جبکہ سندھ سے ارشد مبین احمد اور اعجاز احمد اعوان ایگزیکٹو کمیٹی کے رکن منتخب ہو گئے ہیں۔