آبنائے ہرمز میں دو آئل ٹینکر سمندری بارودی سرنگوں سے ٹکرا کر پھٹ گئے: پاسدارانِ انقلاب

ایران کی پاسدارانِ انقلاب (IRGC) کے شعبۂ تعلقات عامہ نے دعویٰ کیا ہے کہ آبنائے ہرمز میں غیر مجاز راستے سے خفیہ طور پر گزرنے والے 2 آئل ٹینکرز سمندری بارودی سرنگوں سے ٹکرا کر شدید دھماکوں کا شکار ہو گئے ہیں، جس کے نتیجے میں ایک بڑا ٹینکر آگ کی لپیٹ میں آ گیا جبکہ عالمی بحری ادارے وینگارڈ کے مطابق پاناما کے پرچم تلے سفر کرنے والے دوسرے جہاز کا کچھ حصہ پانی میں ڈوب چکا ہے۔ سپاہ پاسداران کا کہنا ہے کہ ان ٹینکرز نے اپنے نیویگیشن سسٹمز بند کر رکھے تھے۔ دوسری جانب امریکی سینٹرل کمانڈ (CENTCOM) نے بارودی سرنگوں سے ٹکرانے کے ایرانی دعوے کو رد کرتے ہوئے موقف اختیار کیا ہے کہ ایران ان تجارتی جہازوں کو نشانہ بنانے کے لیے ڈرونز اور میزائلوں کا استعمال کر رہا ہے۔