اسرائیلی پارلیمنٹ میں سابق یہودی پولیس افسر اسلامی جماعت راعم کا رکن منتخب

اسرائیل کی پارلیمنٹ (نیسٹ) میں ایک انوکھی اور نئی سیاسی مثال قائم ہو گئی ہے جہاں ایک سابق یہودی پولیس افسر باضابطہ طور پر ایک عرب اسلامی جماعت ’راعم‘ (Ra’am) کے ٹکٹ پر رکن منتخب ہو گئے ہیں۔

اسرائیل میں سابق یہودی پولیس افسر یوآو سیگالووٹز (Yoav Segalovitz) نے روایتی یہودی اکثریتی جماعت کو خیرباد کہہ کر عرب قیادت والی اسلامی جماعت راعم میں شمولیت اختیار کر لی ہے، جس نے حالیہ پارلیمانی انتخابات میں 8 نشستیں حاصل کی ہیں۔ وہ جلد ہی اسرائیلی پارلیمنٹ کے رکن کی حیثیت سے اپنے عہدے کا حلف اٹھائیں گے۔ اس انوکھے سیاسی قدم نے ملکی سیاست میں ایک نئی بحث چھڑ دی ہے۔ یوآو سیگالووٹز کا کہنا ہے کہ اس سیاسی اتحاد کا بنیادی مقصد یہ ثابت کرنا ہے کہ یہودی اور عرب شہری مذہب، زبان اور نسل کے تمام تر اختلافات کو بالائے طاق رکھ کر ایک مشترکہ سیاسی پلیٹ فارم پر اکٹھے ہو سکتے ہیں۔

انہوں نے مزید کہا کہ راعم کے رہنما منصور عباس عرب اور مذہبی پس منظر سے تعلق رکھتے ہیں جبکہ وہ خود ایک یہودی اور سیکولر شخصیت ہیں، لیکن اس کے باوجود دونوں برابر کے اسرائیلی شہری ہیں اور ملک و قوم کی ترقی کے لیے انہیں مل کر کام کرنا چاہیے۔ واضح رہے کہ اسرائیل کی کل آبادی کا تقریباً 20 فیصد حصہ فلسطینی عرب شہریوں پر مشتمل ہے جن میں اکثریت مسلمانوں کی ہے؛ انہیں ووٹ ڈالنے اور پارلیمنٹ میں نمائندگی کا مکمل حق حاصل ہے، تاہم عرب آبادی کے بیشتر علاقوں میں غربت، بڑھتے ہوئے جرائم اور سرکاری وسائل کی شدید کمی جیسے مسائل طویل عرصے سے چلے آ رہے ہیں۔ دوسری جانب، راعم کے سربراہ منصور عباس نے بھی اپنے عزم کا اعادہ کیا ہے کہ ان کی جماعت آئندہ بننے والی حکومت کا حصہ بننا چاہتی ہے تاکہ ریاست میں عرب اور یہودی شہریوں کے درمیان باہمی تعاون اور ہم آہنگی کو فروغ دیا جا سکے۔