ملک کو درپیش مسائل کا حل مذاکرات ذریعے ہی نکالا جا سکتا ہے: مولانا فضل الرحمان

جمعیت علمائے اسلام (ف) کے سربراہ مولانا فضل الرحمان نے کہا ہے کہ ملک کو درپیش تمام سیاسی اور معاشی مسائل کا واحد حل محاذ آرائی کے بجائے باہمی مذاکرات اور بات چیت کے ذریعے ہی نکالا جا سکتا ہے۔

مولانا فضل الرحمان نے اکوڑہ خٹک کا دورہ کیا جہاں انہوں نے پروفیسر محمود الحق حقانی مرحوم کے اہلِ خانہ سے ملاقات کی اور ان کے انتقال پر گہرے دکھ، رنج اور افسوس کا اظہار کیا۔ واضح رہے کہ مرحوم پروفیسر محمود الحق حقانی شہید مولانا سمیع الحق کے بھائی تھے۔ سربراہ جے یو آئی نے سوگوار خاندان سے دلی ہمدردی کا اظہار کرتے ہوئے مرحوم کی مغفرت اور بلندیٔ درجات کے لیے دعا کی۔

بعد ازاں میڈیا سے گفتگو کرتے ہوئے مولانا فضل الرحمان کا کہنا تھا کہ حکومت کو تمام سیاسی فریقین کے لیے مذاکرات کے دروازے ہمیشہ کھلے رکھنے چاہئیں، جبکہ وہ خود تمام فریقین کو آئین کی طرف آنے اور تمام تنازعات آئینی دائرہ کار کے اندر رہتے ہوئے حل کرنے کی تلقین کر رہے ہیں۔ انہوں نے اس بات پر زور دیا کہ ریاست کے تمام اداروں کے درمیان آئینی توازن کا ہونا انتہائی ضروری ہے، اور اس مقصد کے لیے ملک میں ایک سازگار، بہتر اور باہمی اعتماد پر مبنی ماحول پیدا کیا جانا چاہیے۔ مولانا فضل الرحمان نے عزم ظاہر کیا کہ ملک کے موجودہ پیچیدہ مسائل کا مستقل حل صرف اور صرف گفت و شنید میں مضمر ہے، اور اس کے لیے تمام متعلقہ فریقین کو سنجیدگی سے اپنا مثبت کردار ادا کرنا ہوگا۔