طالبان رجیم کے خلاف مسلح مزاحمت جاری، متعدد صوبوں میں حملوں کے دعوے

افغان طالبان کے خلاف مختلف مسلح گروپس کی حالیہ جھڑپوں اور گوریلا کارروائیوں میں تیزی آ گئی ہے، جس نے طالبان رجیم کے ملک بھر میں امن اور مکمل کنٹرول کے تمام دعووں کا پول کھول کر رکھ دیا ہے۔

طالبان مخالف متعدد مسلح دھڑوں بشمول ’افغانستان فریڈم فرنٹ‘، ’یونائیٹڈ فرنٹ‘ اور ’نیشنل فرنٹ فار انڈیپینڈنس‘ نے مختلف افغان صوبوں میں تازہ حملوں کی ذمہ داری قبول کرتے ہوئے طالبان اہلکاروں کی ہلاکتوں کے دعوے کیے ہیں۔ مسلح تنظیم ’افغانستان فریڈم فرنٹ‘ کے جاری کردہ بیان کے مطابق، صوبہ کنڑ کے دارالحکومت اسعد آباد میں طالبان کی ایک سکیورٹی چوکی پر گھات لگا کر حملہ کیا گیا، جس کے نتیجے میں ایک طالبان اہلکار ہلاک اور تین دیگر زخمی ہو گئے۔

دوسری جانب، ’افغانستان یونائیٹڈ فرنٹ‘ نے دعویٰ کیا ہے کہ انہوں نے صوبہ زابل کے ضلع شہر صفا میں ایک ٹارگٹڈ کارروائی کے دوران طالبان رجیم کے ایک انٹیلی جنس اہلکار کو ہلاک کر دیا ہے، جبکہ صوبہ کپیسہ کے ضلع تگاب میں کی جانے والی ایک کمانڈو کارروائی کے دوران طالبان فورسز کا ایک اہم کمانڈر ملا سمرگل بھی مارا گیا ہے۔ ادھر ’نیشنل فرنٹ فار انڈیپینڈنس‘ نے بھی دعویٰ کیا ہے کہ دارالحکومت کابل کے قریب ضلع پغمان میں ایک ہدف شدہ کارروائی کے دوران طالبان گروپ کا ایک رکن ہلاک کر دیا گیا ہے۔