وزیراعظم آزاد کشمیر کا وادی سیماری میں ایکو ٹورازم منصوبے کا دورہ، حکومتی سرپرستی کا اعلان

وزیراعظم آزاد کشمیر افتخار گیلانی نے وادی سیماری میں جاری ایکو ٹورازم منصوبے کا تفصیلی دورہ کیا ہے، اور اس منصوبے کو سیاحت کے فروغ کے لیے ایک بہترین اور قابلِ تقلید ماڈل قرار دیتے ہوئے اس کی بھرپور حکومتی سرپرستی کا اعلان کیا ہے۔

دورے کے دوران وزیراعظم آزاد کشمیر کو منصوبے کے فوکل پرسن آصف رضا میر نے پراجیکٹ کا بھرپور معائنہ کروایا اور علاقے کے قیمتی قدرتی وسائل کے تحفظ، مقامی سطح پر روزگار کے نئے مواقع اور سیاحوں کو فراہم کی جانے والی سہولیات کے حوالے سے تفصیلی بریفنگ دی۔ بریفنگ میں بتایا گیا کہ یہ منصوبہ علاقے کے قدرتی ماحول اور حیاتِ وحش کو نقصان پہنچائے بغیر سیاحت کو فروغ دینے کے لیے تیار کیا گیا ہے، جہاں سیاحوں کو فائیو سٹار معیار کی سہولیات فراہم کرنے پر تیزی سے کام جاری ہے۔ اس منصوبے کا ایک اہم مقصد مقامی کمیونٹی کو معاشی طور پر مستحکم کرنا ہے، جبکہ طے شدہ پلان کے تحت پراجیکٹ کا تمام انفراسٹرکچر 12 سال بعد مقامی کمیونٹی کے حوالے کر دیا جائے گا۔

وزیراعظم افتخار گیلانی نے سیماری ایکو ٹورازم پراجیکٹ کے منتظمین کو کامیاب اقدامات پر مبارکباد دیتے ہوئے اس عزم کا اظہار کیا کہ حکومت ایسے پائیدار سیاحتی منصوبوں کی ہر ممکن سرپرستی کرے گی اور خطے میں سیاحت کے فروغ کے لیے سڑکوں سمیت تمام بنیادی ڈھانچے کو بہتر بنایا جائے گا۔ انہوں نے مزید کہا کہ سیماری سڑک کی تعمیر کے ساتھ ساتھ مقامی نوجوانوں اور بچوں کی تربیت کا بندوبست بھی کیا جائے گا تاکہ سیاحتی سرگرمیوں میں وادی کی خوبصورت ثقافت اور روایات کی بھرپور عکاسی ہو سکے۔ اس دورے کے موقع پر انسپکٹر جنرل پولیس لیاقت علی ملک، پرنسپل سیکرٹری عدنان خورشید اور دیگر اعلیٰ حکام بھی وزیراعظم کے ہمراہ موجود تھے۔