گورنر راج کا مقصد معدنی ذخائر پر قبضہ ہے، ملک کسی جرنیل کی جاگیر نہیں:مولانا فضل الرحمان

جمیعت علمائے اسلام (ف) کے سربراہ مولانا فضل الرحمان نے قومی اسمبلی کے اجلاس سے خطاب کرتے ہوئے ملک میں آئین اور جمہوریت کی موجودہ صورتِ حال پر شدید تحفظات کا اظہار کیا ہے۔ انہوں نے انکشاف کیا کہ پی ٹی آئی کے لانگ مارچ اور مطالبات کے حل کے لیے انہوں نے وزیراعظم اور پی ٹی آئی قیادت کے درمیان درمیانی راہ نکالنے کی کوشش کی، مگر حکومت نے سیاسی حل کی بجائے خیبر پختونخوا میں گورنر راج اور ایمرجنسی نافذ کر دی۔ ان کا کہنا تھا کہ حکومت کا اصل مقصد صوبے کے معدنی ذخائر تک رسائی حاصل کرنا تھا، جبکہ بلوچستان میں زیادہ خراب حالات کے باوجود ایسا اقدام نہیں کیا گیا۔ مولانا فضل الرحمان نے واضح کیا کہ ملک کسی جرنیل کی جاگیر نہیں ہے اور اگر حکومت نے ان کے جلسوں کو روکنے یا ٹکر لینے کی کوشش کی تو جے یو آئی سخت مزاحمت کے لیے تیار ہے، ساتھ ہی انہوں نے سیاسی بحران سے نکلنے کے لیے تمام سیاسی جماعتوں کو نئے میثاقِ جمہوریت کی دعوت دی۔