جسٹس محسن اختر کیانی مستعفی: 26 ویں و 27 ویں آئینی ترامیم سے عدلیہ کی آزادی متاثر ہوئی، متن

اسلام آباد ہائیکورٹ کے سینئر ترین جج جسٹس محسن اختر کیانی نے اپنے عہدے سے استعفیٰ دے دیا ہے۔ صدر مملکت کو بھیجے گئے استعفے کے متن کے مطابق انہوں نے ذاتی وجوہات، صحت کی خرابی اور ضمیر کی آواز پر یہ فیصلہ کیا۔ انہوں نے مؤقف اختیار کیا کہ 26 ویں اور 27 ویں آئینی ترامیم کے بعد ہائیکورٹس کی آزادی اور ادارہ جاتی خودمختاری شدید متاثر ہوئی ہے، جبکہ ججز کی تقرریوں اور تبادلوں میں انتظامیہ کی بڑھتی مداخلت سے عدلیہ کے آزادانہ کردار اور عام سائلین کے اعتماد کو دھچکا پہنچا ہے۔ اپنے عدالتی کیریئر میں 23 ہزار سے زائد مقدمات کا فیصلہ کرنے والے جسٹس محسن اختر کیانی کا کہنا تھا کہ موجودہ حالات میں ان کا ضمیر جج کے فرائض جاری رکھنے کی اجازت نہیں دیتا، لہٰذا وہ وکالت میں واپس آ کر عوامی حقوق کا تحفظ اور قانونی شعور اجاگر کریں گے۔