ایران کے جوہری پروگرام پر تنازع کا حل صرف سفارت کاری ہے: چین

اقوامِ متحدہ کی سلامتی کونسل میں چین کے مستقل مندوب فوکانگ نے خطاب کرتے ہوئے واضح کیا ہے کہ ایران کے جوہری پروگرام پر پیدا ہونے والے تنازع کا واحد اور پائیدار حل صرف سفارت کاری میں مضمر ہے۔ انہوں نے زور دیا کہ جنگ کا خاتمہ کر کے امریکہ اور ایران کے درمیان دوبارہ مذاکرات کی راہ ہموار کی جائے، جبکہ موجودہ بحران کی بنیادی وجہ امریکہ کا جامع ایٹمی معاہدے (JCPOA) سے یکطرفہ انخلا ہے۔ چینی مندوب کا کہنا تھا کہ امریکہ اور اسرائیل کے ایرانی جوہری تنصیبات پر حملوں سے عالمی ایٹمی توانائی ایجنسی (IAEA) کا نگرانی کا عمل متاثر ہوا ہے۔ چین نے ایران پر زور دیا کہ وہ ایٹمی ہتھیار نہ بنانے کے عزم پر قائم رہے، جبکہ دیگر عالمی طاقتوں سے مطالبہ کیا کہ وہ ایران کے پرامن ایٹمی توانائی کے حق کا احترام کریں اور مشرقِ وسطیٰ کو مزید تباہی سے بچانے کے لیے طاقت کے استعمال سے گریز کریں۔