نو ماہ میں 5,143 انٹیلی جنس بیسڈ آپریشنز، 2,410 دہشت گرد ہلاک اور 3,518 گرفتار: محسن نقوی کی ایوان میں رپورٹ

وفاقی وزیرِ داخلہ محسن نقوی نے قومی اسمبلی میں تحریری جواب جمع کرواتے ہوئے بتایا ہے کہ جاری سال میں یکم جنوری سے 29 ستمبر 2026ء تک ملک بھر میں قومی ایکشن پلان کے تحت 5,143 انٹیلی جنس بیسڈ آپریشنز (IBOs) کیے گئے ہیں۔ ان کارروائیوں کے دوران 2,410 دہشت گرد ہلاک، 806 زخمی جبکہ 3,518 کو گرفتار کیا گیا۔ وزیرِ داخلہ کے مطابق آن لائن انتہا پسندانہ مواد کی روک تھام پر درکار توجہ نہیں دی جا سکی اور سوشل میڈیا کمپنیوں کی جانب سے انتہا پسندانہ مواد بلاک کرنے کی درخواستوں پر عمل درآمد کی شرح انتہائی کم رہی۔ ایوان کو فراہم کی گئی تفصیلات کے مطابق ایکس (X) کی جانب سے صرف 7.4 فیصد، یوٹیوب 1.9 فیصد اور فیس بک کی جانب سے 38 فیصد درخواستوں پر عمل درآمد کیا گیا، جس سے آن لائن پلیٹ فارمز پر انتہا پسندی کے خاتمے میں چیلنجز کا سامنا ہے۔