امریکا 96 گھنٹوں میں ایران پر بڑا حملہ کرسکتا ہے: امریکی میڈیا کا دعویٰ

امریکی نشریاتی ادارے سی این این نے دو امریکی عہدیداروں کا حوالہ دیتے ہوئے دعویٰ کیا ہے کہ مشرقِ وسطیٰ میں مقیم امریکی افواج صدر ڈونلڈ ٹرمپ کے احکامات ملتے ہی 96 گھنٹوں کے اندر ایران کے خلاف وسیع پیمانے کی نئی فوجی کارروائی شروع کرنے کی صلاحیت رکھتی ہیں۔ رپورٹ کے مطابق مجوزہ اقدام صرف بنیادی فوجی اہداف تک محدود نہیں ہوگا بلکہ امریکی سینٹرل کمانڈ (سینٹ کام) اور پینٹاگون کے پاس تیار کردہ فہرست میں ایرانی توانائی کے انفراسٹرکچر، فوجی تنصیبات اور جوہری مراکز بھی شامل ہو سکتے ہیں۔ تاہم حکام کا کہنا ہے کہ صدر ٹرمپ نے فی الحال کسی حتمی اقدام کا حکم نہیں دیا، کیونکہ ماضی کی طرح وہ آخری لمحات میں موقف تبدیل کر سکتے ہیں، جبکہ پیشگی واقفیت کے باعث ایرانی افواج کو تمام اہداف سے مکمل بے اثر کرنا امریکہ کے لیے بڑا چیلنج رہے گا۔