احسن بھون نے کیپٹن (ر) صفدر کے خلاف 5 ارب روپے ہرجانے کا دعویٰ دائر کر دیا، ڈیفیمیشن ٹربیونل کا نوٹس جاری

ممبر جوڈیشل کمیشن احسن بھون نے مسلم لیگ (ن) کے رہنما کیپٹن (ر) محمد صفدر کے خلاف پنجاب ڈیفیمیشن ٹربیونل میں 5 ارب روپے کا ہرجانہ دائر کر دیا ہے۔ ٹربیونل نے دعوے کو قابلِ سماعت قرار دیتے ہوئے کیپٹن (ر) صفدر کو 11 نومبر کے لیے نوٹس جاری کر دیا ہے۔ دائر دعوے میں مؤقف اختیار کیا گیا ہے کہ کیپٹن (ر) صفدر نے ٹی وی انٹرویوز اور سوشل میڈیا پر احسن بھون کی پنجاب یونیورسٹی کی تصدیق شدہ قانون کی ڈگری اور پیشہ ورانہ اہلیت کے خلاف مبینہ ہتک آمیز بیانات دیے، جس سے ان کی دہائیوں پر محیط قانونی ساکھ کو شدید نقصان پہنچا۔ احسن بھون نے عدالت سے ایک ارب روپے عمومی، دو ارب روپے خصوصی اور دو ارب روپے تعزیری ہرجانے کی استدعا کے ساتھ کیپٹن (ر) صفدر کو بیانات واپس لینے اور غیر مشروط معافی مانگنے کا حکم دینے کی بھی درخواست کی ہے۔