ساہیوال میں بھی ای چالان سسٹم کا آغاز، ٹریفک خلاف ورزیوں کی نگرانی شروع

شہر کے اندرونی علاقوں میں بھی ٹریفک نظم و ضبط اور روڈ سیفٹی کو بہتر بنانے کے لیے ای چالان (E-Challan) سسٹم کا باقاعدہ آغاز کر دیا گیا ہے۔ اب سیف سٹیز اتھارٹی کے جدید کیمروں کے ذریعے گنجان آباد اور اندرونی شاہراہوں پر بھی ٹریفک قوانین کی خلاف ورزیوں کی نگرانی شروع کر دی گئی ہے۔

انتظامیہ کے مطابق ابتدائی مرحلے میں شہریوں کو آگاہی فراہم کرنے کی غرض سے صرف وارننگ چالان جاری کیے جا رہے ہیں، تاہم اس کے بعد ٹریفک قوانین کی خلاف ورزی کرنے والوں کو باقاعدہ الیکٹرانک چالان بھیجے جائیں گے۔

حکام کا کہنا ہے کہ اندرونی شہر میں ای چالان کا دائرہ کار بڑھانے کا بنیادی مقصد ٹریفک حادثات میں نمایاں کمی لانا، شہریوں میں قوانین کی پاسداری کا شعور اجاگر کرنا اور سڑکوں پر آمدورفت کو محفوظ بنانا ہے۔