مظاہرین اپنے مؤقف پر قائم رہیں، احتساب کے مطالبے سے پیچھے نہ ہٹیں: باقر قالیباف

ایرانی پارلیمنٹ کے اسپیکر محمد باقر قالیباف نے مغربی ممالک میں احتجاج کرنے والے شہریوں پر زور دیا ہے کہ وہ اپنے مطالبات پر قائم رہیں اور حکومتوں کے احتساب سے پیچھے نہ ہٹیں۔ انہوں نے مظاہرین کو متنبہ کیا کہ وہ شناخت اور نسل پر مبنی تقسیم کی کوششوں کا مقابلہ کریں۔

سماجی رابطے کی ویب سائٹ ایکس (سابقہ ٹوئٹر) پر جاری اپنے ایک بیان میں سپیکر باقر قالیباف نے کہا کہ عوامی غصے کا رخ موڑنے کے لیے ایک مخصوص اور منظم طریقہ کار استعمال کیا جاتا ہے، تاکہ عوام کو اپس میں تقسیم کر کے طاقتور حلقوں کو احتساب سے بچایا جا سکے۔ انہوں نے جیفری ایپسٹین اسکینڈل، غزہ کی بحرانی صورتحال، ایران کے خلاف جنگی بیانیے اور عالمی بدعنوانی کو ایک ہی بااثر اور مخصوص گروہ سے منسلک قرار دیا۔

ایرانی سپیکر کا یہ بیان ایک ایسے وقت میں سامنے آیا ہے جب فرانس سمیت متعدد یورپی ممالک میں شدید مہنگائی، رہائش کے بڑھتے ہوئے اخراجات، تعلیمی مسائل اور بنیادی عوامی خدمات کے معیار میں کمی کے خلاف بڑے پیمانے پر مظاہرے دیکھنے میں آ رہے ہیں۔