خیبرپختونخوا: اپیکس کمیٹی کا اجلاس، دہشت گردی کے مکمل خاتمے کا عزم

وزیراعظم محمد شہباز شریف نے پشاور کے گورنر ہاؤس میں نیشنل ایکشن پلان کی فیڈرل ایپکس کمیٹی کے اجلاس کی صدارت کرتے ہوئے عزم کا اظہار کیا ہے کہ وفاقی حکومت عسکری قیادت کے ساتھ مل کر خیبر پختونخوا کے تمام سیاسی، معاشی اور سیکیورٹی مسائل حل کرے گی۔ اجلاس کے دوران خیبر پختونخوا کے 12 اضلاع میں ایمرجنسی، امن و امان کی صورتِ حال اور صوبے کی معاشی و انتظامی صورتِ حال پر تفصیلی بریفنگ دی گئی۔ وزیراعظم نے خطاب کرتے ہوئے کہا کہ گزشتہ چند سالوں کے دوران اور پی ٹی آئی کے دورِ حکومت میں انسدادِ دہشت گردی پر توجہ نہ دینے اور 800 ارب روپے کے این ایف سی فنڈز کے باوجود سیکیورٹی اور عوامی سہولیات کو نظر انداز کرنے کی وجہ سے مجبوری میں آئین و قانون کے مطابق گورنر راج اور ایمرجنسی نافذ کرنی پڑی۔ اجلاس میں چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر، نائب وزیراعظم اسحاق ڈار، گورنر فیصل کریم کنڈی اور وفاقی وزراء سمیت اعلیٰ عسکری و مدنی قیادت نے شرکت کی، جبکہ صوبے سے کرپشن کا خاتمہ، سیکیورٹی اداروں کو جدید سہولیات کی فراہم اور عوامی ترقی کے منصوبوں کی جلد تکمیل کے عزم کا اعادہ کیا گیا۔