کرک میں سی ٹی ڈی اور پولیس پر دہشت گردوں کا حملہ: ڈی ایس پی اور ایس ایچ او سمیت 4 اہلکار شہید، 2 دہشت گرد ہلاک

خیبر پختونخوا کے ضلع کرک میں کاؤنٹر ٹیررازم ڈیپارٹمنٹ (سی ٹی ڈی) اور پولیس کی ٹیم پر دہشت گردوں کے اچانک حملے کے نتیجے میں ڈی ایس پی عمران الدین اور ایس ایچ او افضل اعوان سمیت 4 اہلکار جامِ شہادت نوش کر گئے۔ پولیس ذرائع کے مطابق شہید ہونے والوں میں دو سپاہی امجد اور کاظم بھی شامل ہیں۔ واقعے کے فوراً بعد شدید فائرنگ کا تبادلہ شروع ہو گیا جس میں دو دہشت گردوں کی ہلاکت کی بھی اطلاعات موصول ہوئی ہیں۔ علاقے میں بدستور فائرنگ اور سیکیورٹی آپریشن جاری ہے، جبکہ پولیس اور قانون نافذ کرنے والے اداروں کی بھاری نفری جائے وقوعہ کی جانب روانہ کر دی گئی ہے تاکہ علاقے کو گھیراؤ میں لے کر ملزمان کا قلع قمع کیا جا سکے۔