پاکستان اورمالدیپ کا دوطرفہ تجارتی حجم 20 کروڑ ڈالر تک بڑھانے پر اتفاق

پاکستان اور مالدیپ کے درمیان دوطرفہ تعلقات کو مستحکم بنانے کے لیے تجارت، آئی ٹی، مصنوعی ذہانت، دفاع، تعلیم، صحت اور سیاحت سمیت مختلف شعبوں میں 20 مفاہمتی یادداشتوں (MoUs) اور معاہدوں پر دستخط کی تقریب اسلام آباد میں منعقد ہوئی۔ وزیراعظم شہباز شریف اور مالدیپ کے صدر ڈاکٹر محمد معیزو نے مشترکہ اعلامیے پر دستخط کیے۔ بعد ازاں مشترکہ پریس کانفرنس سے خطاب کرتے ہوئے دونوں رہنماؤں نے آئندہ دو سالوں کے دوران دوطرفہ تجارتی حجم کو 13 کروڑ ڈالر سے بڑھا کر 20 کروڑ ڈالر تک لے جانے کے عزم کا اعادہ کیا۔ وزیراعظم شہباز شریف نے مالدیپ کو آئی ٹی و تکنیکی معاونت کی یقین دہانی کرائی اور مسئلہ کشمیر، فلسطین سمیت بھارت کی جانب سے سندھ طاس معاہدے کی یکطرفہ معطلی پر واضح موقف دیتے ہوئے خبردار کیا کہ پانی پاکستان کی ریڈ لائن ہے اور اسے روکنے کی کوئی بھی کوشش جنگی اقدام تصور ہوگی۔ مالدیپ کے صدر ڈاکٹر معیزو نے بھی دونوں ممالک کے 60 سالہ سفارتی تعلقات اور پاکستان کے ساتھ تعلیمی و معاشی شراکت داری کو سراہا۔