وزیراعظم شہباز شریف نے آٹو پالیسی 2026-2031 کی منظوری دے دی

وزیراعظم شہباز شریف نے ملک کے آٹو موبائل سیکٹر کی پائیدار ترقی، مقامی پیداوار میں اضافے اور برآمدی صلاحیت کو فروغ دینے کے لیے آٹو پالیسی 2026-2031 کی باضابطہ منظوری دے دی ہے۔

پالیسی دستاویز کے مطابق، نئی آٹو پالیسی کے تحت آٹو سیکٹر کی برآمدات کو 6 ارب ڈالر اور آٹو پارٹس کی برآمدات کو 1.2 ارب ڈالر تک پہنچانے کے اہداف مقرر کیے گئے ہیں۔ الیکٹرک گاڑیوں (EVs) کے استعمال کو فروغ دینے کے لیے آئی ایم ایف کی 18 فیصد سیلز ٹیکس کی تجویز کو مسترد کرتے ہوئے بیٹری الیکٹرک گاڑیوں پر محض 1 فیصد، رینج ایکسٹینڈڈ ای ویز پر 6 فیصد اور پلگ ان ہائبرڈ پر 9 فیصد سیلز ٹیکس رکھنے کا فیصلہ کیا گیا ہے۔ مزید برآں، ای وی خریدنے کے لیے بینک فنانسنگ کی حد 30 لاکھ سے بڑھا کر 1 کروڑ روپے اور مدت 3 سال سے بڑھا کر 5 سال کر دی گئی ہے۔

پالیسی میں آٹو سیکٹر کی تجارتی مسابقت بڑھانے کے لیے ٹیرف اور درآمدی ڈیوٹیز کو 2030-31 تک 15 فیصد تک لانے کی حکمت عملی منظور کی گئی ہے۔ برآمدی اہداف پورا کرنے والی کمپنیوں کو 5 سے 10 فیصد تک اضافی مراعات دی جائیں گی، جبکہ مسلسل 2 سال ناکام رہنے والی کمپنیوں کے مینوفیکچرنگ سرٹیفکیٹ منسوخ کر دیے جائیں گے۔ 1000 سی سی سے بڑی گاڑیوں پر ‘آٹوموٹیو ڈیولپمنٹ لیوی’ عائد کر کے حاصل ہونے والے 232 ارب روپے کو مقامی انڈسٹری کی اپ گریڈیشن، ریسرچ اور عالمی معیار کی حفاظت کو یقینی بنانے کے لیے پاکستان آٹوموٹیو ٹیسٹنگ انسٹیٹیوٹ کے قیام پر خرچ کیا جائے گا۔